主打平靚正的兩餸飯店在香港開到成行成市，其中在多區設有分店的權發小廚深受食客支持，門外更不時出現排隊人龍。惟近期有男食客於網上群組公審「權發」店員，指因原先選擇的菜式因西蘭花數量不足，要求多搭蝦球補上，惟遭店員拒絕並提出以其他餸菜作補償。然而雙方始終未能達成共識，該男子當場爆粗怒罵店員，更要求對方做1事。對於店員被客人責罵，「權發」公開CCTV片段還原事件，引來不少網民討論。
買兩餸飯不夠西蘭花 食客要求多搭蝦球遭拒爆粗：X你老X！
打開門做生意，多數老闆都要求員工按照規則辦事，面對突發情況有時或未必能夠彈性處理。人氣兩餸飯店「權發小廚」早前被男食客公審銅鑼灣店的店員，稱買三餸飯時選擇要西蘭花蝦球，「比完之後同我講唔夠，比其他嘢比我」。男事主認為如西蘭花分量不足，可以多給蝦球補上，「佢都可以同我講話唔比，X佢老X，做嘢有冇咁死板」，控訴對方「話唔做我生意」，更稱本來要求多飯，「好似唔原（願）比我咁」。
權發公開CCTV片段還原事件：打工仔何必難為打工仔
面對店員被客人公審，「權發」近日公開事發分店的CCTV片段。從影片中可見，男事主自備玻璃飯盒，下單要一客三餸飯。當店員裝白飯後，飯盒已經填滿一半，隨後事主要求再加飯，店員解釋這樣可能會不夠位裝餸，惟事主堅持，店員亦按其要求再多添飯。
其後，顧客選擇西蘭花蝦球作為其中一餸，店員解釋西蘭花份量不足，建議顧客可額外選擇其他餸菜作為補充。然而，顧客要求「畀埋啲蝦丫！」，店員回應只能提供兩隻蝦並搭配其他餸菜。顧客聽後突然動怒，指責店員未有事先告知西蘭花份量不足，而店員則表明一開始已經提出。隨後事主爆粗辱罵店員，而店員為息事寧人，提出退款並將餸菜倒回鐵盆內，事主更要求店員「抹返乾淨個兜佢，X你老X臭X！」
「權發」於網上專頁發文維護店員，表示公司規定「蝦球跟飯兩隻，揀唔啱可以退款」，認為事主言行難為打工仔，無需以侮辱性言語攻擊店員及其家人，強調「我哋啲人工唔包括俾人問候母親」。「權發」進一度指出，事主不應將店員放到網上公審，人與人之間在乎互相尊重，客人固然重要，「但係員工亦都係我哋好寶貴�H資源」。
網民評理雙方都有錯：但使唔使用粗口鬧人？
對於店員被客人以粗口當場大罵，有網民認為店員𢳂餸之前應要聲明不夠餸，與客人取得共識才裝入飯盒，同時認為事主「確實小氣，難為了姐姐」，表示若不喜歡處理手法大可不再光顧，「使唔使用粗口鬧人！冇啲風度！」。有網民則認為蝦球較貴，店員按照公司規矩做事，「唔通比蝦你份工都冇埋」，形容事主處事不理智及沒有禮貌，「不是猛說粗口就是你惡晒，一定就晒你」、「的確令人有多幾隻蝦都唔想俾佢」。
事發時店舖接近關門時間，有網民好奇「點解唔變通吓畀埋佢呢？」，店方則回應指當時現場還有其他客人，店員不敢自作主張，「我哋試過俾咗，下次亦都會話上次嗰個都俾你又唔俾，咁樣員工都無所適從」，店方以四季豆一餸再多送兩隻蝦為例，「一個三餸飯�H飯量係平時�H一倍有多，仲要送多兩隻蝦球，咁都唔滿意，你都唔使幫襯啦」。
與此同時，有網民指出如不夠西蘭花，不如索性停止出菜，質疑店方是想借客人清「餸尾」，「你哋係咪想監人要？」、「事實係你唔夠餸，又𢳂俾人」；有網民則認為雙方語氣不好，但菜跟蝦是兩回事，「點可以唔夠西蘭花就比多啲蝦你？」、「諗都諗到蝦球呢類食材份量一定有控制，點可以逼食肆加多件？」。有食客提醒員工要多留意衛生問題，「如果客人帶玻璃兜嚟買餸，就算唔要都唔應該將啲餸泊返落去，你點知佢個玻璃兜乾唔乾淨？」
https://www.stheadline.com/food/3493281/
